AQShning Consumer Reports nashri 2015 yilning eng yomon avtomobillari ro'yxatini e'lon qildi. Jurnalistlar ekspertlar bilan birga mashinalarni sinovdan o'tkazib, shunga yarasha reyting tuzib chiqishdi.

Testlar chog'ida Consumer Reports jurnalistlari avtomobillarni ko'plab parametrlar bo'yicha baholab, 1dan 100 ballgacha baholab chiqishdi. Reytingga eng past ball to'plagan mashinalar kiritildi.

Toyota Yaris xetchbeki sinov natijalariga ko'ra 47 ball to'pladi. Mutaxassislar salon ichining torligi, shovqin izolyatsiyasining yomonligi va rulning noqulayligini qayd qilishdi. Bundan tashqari, dinamik ko'rsatkichlar pastligi, o'tkazmalar qutisida faqat to'rt diapazonning borligi ularga yoqmadi.

tC Scion kupesi (Toyota’ga tegishli) 44 ball to'play oldi. Ekspertlar unda ham aynan shu kamchiliklar borligini, lekin ular yanada chigallashtirilganini ta'kidlab o'tdilar.
Mitsubishi i-MiEV elektrokari 35 ballgagina erishdi. Yurish ko'rsatkichlarining pastligi, dinamik ko'rsatkichlarning yomonligi va eski intereri tufayli uning natijasi past bo'ldi.

Mitsubishi’ning yana bir modeli – Mirage xetchbeki sinovlarda 29 ball to'pladi. Besh eshikli mashina 3 tsilindrli dvigatelning vibratsiyasi va boshqaruvning yomonligi tufayli bunday past natija qayd qildi.

Eng past natija esa Jeep Wrangler Unlimited yo'ltanlamasiga tegdi – model faqat 20 ball to'play oldi. Sinovchilarning fikricha, uni boshqarish qiyin, yurish ko'rsatkichlari past, yoqilg'i sarfi esa juda yuqori: 100 km ga 14 l. Shunga qaramay, Wrangler egalarining 76 foizi mashinadan ko'ngli to'lganini, uni qaytadan xarid qilishga tayyorligini ta'kidlashdi.