Professional boksning superog'ir vazn toifasida WBA (Regular) chempionlik kamari sohibi, o'zbekistonlik tajribali bokschi Ruslan Chagaev hamda bu kamar uchun da'vogar, Avstraliya vakili Lukas Braun o'rtasida 2016 yilning 5 mart kunida, Checheniston poytaxti Grozniy shahridagi "Kolizey" sport saroyida jang o'tkaziladi. Bu haqda Checheniston prezidenti Ramzan Qodirov o'zining ijtimoiy tarmoqlardagi akkauntlari orqali ma'lum qilgan.

"Sizlarga o'ta muhim xabarni etkazmoqchiman. 2016 yilning beshinchi martida "Kolizey" sport saroyida katta jang bo'lib o'tadi. "Ahmat" sport klubi vakili Ruslan Chagaev avstraliyalik Lukas Braunga qarshi ringga ko'tariladi. Ruslanning raqibi juda kuchli, u 23ta jang o'tkazib barchasida g'alaba qilgan. U mag'lubiyat nimaligini bilmaydi. Ishonch bildiramanki, o'sha kuni shiddatli jang guvohiga aylanamiz", deya yozgan Ramzan Qodirov.

Biroz oldinroq, Braunga qarshi o'tkazilishi kutilayotgan jangda g'alaba qozonsa Chagaev britaniyalik Tayson Fyuriga qarshi ringga ko'tarilish imkoniga ega bo'lishi xabar qilingandi.

Fyuri 29 noyabr kuni Germaniyaning Dyusseldorf shahrida ukrainalik Vladimir Klichkoni ochkolar bo'yicha mag'lub etib, IBF, IBO, WBO va WBA (Super) versiyalari bo'yicha jahon chempionligini qo'lga kiritdi. Chagaev esa ushbu vazn toifasining WBA versiyasi muntazam chempioni hisoblanadi. Britaniyalik bokschining kamarilariga (IBF) da'vogarlar orasida ukrainalik Vyacheslav Glazkov ham bor.

Chagaev o'z faoliyatida ikki marta mag'lubiyatli jang o'tkazgan, 2009 yilda ukrainalik Vladimir Klichko hamda 2011 yilda rossiyalik Aleksandr Povetkinga qarshi janglarda. Uning hisobida 34ta g'alabali jang (shundan 21ta nokaut) mavjud. Braunda esa bu ko'rsatkich 23 g'alaba va 20 nokautga teng. U hali ringni boshi egik holda tark etmagan.

Eslatib o'tamiz, Chagaev 17 oktyabr sanasida Fres Okendoga qarshi ringga chiqishi kerak edi. Okendoning jarohati sababli Chagaevga qarshi ringga chiqmadi va jang bekor qilindi.

Chagaev oxirgi jangini shu yilning 11 iyul sanasida Franchesko Pyanetaga qarshi ringga chiqdi va raqibini birinchi raundda nokautga uchratib g'alabaga erishgandi.

Bundan oldinroq, Braun WBA o'ziga Chagaev bilan jang qilish uchun ruxsat berishini intizorlik bilan kutayotganini bildirib o'tgandi.