Qozog'iston matbuoti ko'p bolali oilalardan birining uy-joy muammolarini ko'tarib chiqdi. Aytilishicha, Chimkentning Intimoq tumanida istiqomat qiluvchi oilada 10 nafar farzand bo'lib, ularning eng kattasi 15 yoshda, eng kichkinasi esa 5 oylikdir.

Aytilishicha, bolalar dars tayyorlashga joy topa olmaydi, butun oila ovqatlanishi uchun esa har safar uch marta ketma-ket dasturxon yozishiga to'g'ri keladi.

10 farzandni dunyoga keltirgan 28 yoshli Qarlig'och Dariboeva “Ona dong'i” ordeniga ega bo'lganiga qaramay, u hanuz oilasi bilan bir xonali uyda yashab kelmoqda. Bu uy ham ularga tegishli bo'lmay, bepul bo'lgani uchungina turishibdi.

Katta qizlar ota-onasi bilan bir xonada yotishdan hijolat bo'la boshlagan, kichkinalar o'ynashga joy topa olmayapti, 5 oylik go'dak esa tinimsiz yig'laydi, deb tasvirlaydi ahvolni jurnalist.

“Sutim qochib ketdi. Bolaga sun'iy aralashmalar bermoqdamiz. Uch kun muqaddam u ham tugadi, endi unga shirin nonni suvga botirib beryapmiz”, - deydi ayol.

Uyda isitish tizimi ishlamagani uchun allaqachon sovuq tushgan, bolalarning deyarli barchasi shamollagan.

13 yoshli Guldenning tan olishicha, ayni paytda ota-onasi ularga hatto dars tayyorlash uchun daftar sotib olib bera olmaydi. Uning singlisi Ravona esa nafaqat ovqatlanishda, balki kiyinishda ham navbatga turishlarini, bitta libosni almashtirib kiyishlarini aytdi.

Kam ta'minlangan oilaga beriladigan nafaqa 20 ming tengeni tashkil qiladi. Qorovul bo'lib ishlaydigan oila rahbarining maoshi 40 ming tenge. 60 ming tenge Chimkent shahrida 12 kishidan iborat oilani boqishga kamlik qiladi.

2012 yilda oila uy olish uchun navbatda turgan edi. Xonadon masalasi 2015 yilda hal qilinishi va'da etilganiga qaramay, masala hal bo'lmay qolib ketdi.

Chimkent shahar hokimiyati uy-joy sektori mudirasi Gulnor Qudoyberganqizining aytishicha, ushbu oila ijtimoiy muhofazaga muhtoj 11 toifadan biriga mansub.

“Bu toifa vakillaridan 7 600 nafari uy olish uchun navbatda turibdi. Hozir 1987-1990 yillarda ro'yxatga olinganlarning navbati keldi. Qarlig'och Dariboeva esa 2012 yilda navbatga turgan”, - tushuntirdi u.