0 noyabrga o'tar kechasi Moskvadagi Birinchi shahar shifoxonasida rossiyalik mashhur rejissyor Eldar Ryazanov 88 yoshida olamdan o'tdi. TASS axborot agentligi bu xabarni o'z manbasi orqali tasdiqlagan.

Eldar Ryazanov 21 noyabr kuni og'ir ahvolda shifoxonaga yotqizilgandi. Bungacha ham u yurak xuruji tufayli sentyabr va oktyabr oylarida davolanib chiqqandi.

Biroz oldinroq, unga sun'iy yurak ventilyatsiyasi ulangani xabar qilingandi.

Ma'lumot uchun, ushbu rejissyor "Karnaval kechasi", "Avtomobildan ehtiyot bo'ling", "Qaroqchi chollar", "Taqdir hazili yoki qushdek engil bo'ling!", "Ishdagi ishq", "Ikki kishilik bekat" kabi o'zbek kinotomoshabinlari uchun ham qadrdon bo'lib qolgan kinokartinalar ishlagan edi.

Eldar Aleksandrovich Ryazanov 1927 yilning 18 noyabrida Samara shahrida, kinochilar oilasida tug'ilgan. 1950 yilda Ryazanov Butunrossiya davlat kinematografiya universitetini bitirgan. Shundan so'ng u 5 yil davomida hujjatli filmlar bo'yicha Markaziy studiyada ishlagan, keyin "Mosfilm"ga kelgan. 1956 yilda uning ilk jiddiy ishi "Karnaval kechasi" suratga olingan.

U stsenariynavis Emil Braginskiy bilan hamkorlikda "Avtomobildan ehtiyot bo'ling", "Qaroqchi chollar", "Taqdir hazili yoki qushdek engil bo'ling!", "Ishdagi ishq", "Ikki kishilik bekat", "Omad zigzagi", "Italiyaliklarning Rossiyadagi g'aroyib sayohati", "Garaj" kabi kartinalarni ishladi.

1980-yillarda uning lirik kartinalari "Beshafqat romans" va "Fleyta uchun kuy" kabilar dunyoga keldi. O'tgan asrning 90-yillarida esa uning rejissyorligidagi ijtimoiy tragikomediyalar: "Va'da qilingan osmon" va "Qari qirchang'i" kabilar paydo bo'ldi. Ryazanovning so'nggi filmlari sifatida "Andersen ertagi. Sevgisiz hayot", "Karnaval kechasi-2. Yoki 50 yil o'tib" telefilmi (2007) bo'lib qoldi.

U 1977 yilda "Taqdir hazili yoxud qushdek engil bo'ling!" filmi uchun SSSR oliy mukofoti bilan taqdirlangan. 1979 yilda esa "Ishdagi ishq" filmi uchun aka-uka Vasilev nomidagi davlat mukofotiga loyiq ko'rilgan. Shuningdek, 1996 va 2008 yillarda "Vatan oldidagi xizmatlari uchun" III va II darajali mukofotlar bilan taqdirlangan. Qolaversa turli yillarda unga Do'stlik ordeni, 2 marta Mehnat ordeni berilgan.