“Big Delta” – дунёдаги энг катта 3D-принтер. Бу 12 метрли қурилма кам энергия сарфлаган ҳолда арзон уй қуриш учун мўлжалланган. 

"Чоп этиладиган" уйлар тобора кенг оммалашиши мумкин, чунки Бирлашган Миллатлар Ташкилотининг тахминича, келаси 15 йилда дунё бўйича кунига юз мингтадан янги уйга эҳтиёж пайдо бўлади. Арзон ва осон қуриладиган уйлар эса бу борада энг яхши ечим бўлади. Бундан ташқари, бундай усулдаги қурилиш экологик тоза ҳисобланади.

Италиянинг барча ўлчамдаги 3D-принтерлар ишлаб чиқарувчи “WASP” инжиниринг компанияси қурилиш соҳасига кириб келмоқда. Компания ўтган йили тупроқ, лой ва табиий толалар асосида ишлайдиган 4,5 метрли принтер ишлаб чиқарганди. Энди эса 12 метрли “Big Delta” принтерини оммага ҳавола этди.

Диаметри 6 метрли каркас, айланиб турувчи лойқоргичга эга бўлган принтер атиги 10 ватт энергия сарфлайди. Принтер лойдан тортиб цементгача бўлган турли қурилиш ашёларидан фойдаланади.