Meksika janubida suv ostida 400 yil oldin qurilgan qadimiy cherkov borligi ma'lum bo'ldi.

The Independent nashrining yozishicha, Meksikaning Chyapas shtatidagi qurg'oqchilik tufayli Grixalva daryosidagi suvlar kamaygan hamda hududdagi suv omboridagi suv hajmi keskin pasayib, uning tubidagi bino yuzaga chiqib qolgan.
Ma'lum qilinishicha, suv hajmi 24 metrga pasayishi natijasida, 16 asrga mansub cherkov binosi yuzaga "o'sib chiqqan".

Ayni vaqtda ispan kolonizatorlari tomonidan qurilgan bu bino devorlarining bir necha metrlik qismi suv ustida ko'rinib turibdi. Cherkovning umumiy balandligi 10 metrni tashkil etishi aniqlangan. Uning uzunligi 61 m, kengligi esa 14 metr.

Qayd etish kerakki, suv ostida bunday bino borligi 1966 yilda ma'lum bo'lgan, 2002 yilda u ilk bor "uyqudan uyg'ongan", ya'ni ilk marta yuzaga chiqib qolgandi.
Lekin bu safar suv hajmi keskin pasaygani tufayli u uzoqlardan ham yaqqol ko'rinib turibdi. Aholi uni tomosha qilish uchun bormoqda.