Oxirgi paytlarda ijtimoiy tarmoqlarda va matbuotda ko'plab muhokamaga sabab bo'layotgan xonanda Munisa Rizaeva 19-21 oktyabr kunlari “Istiqlol” san'at saroyida o'tkazgan kontsert dasturidan so'ng yana bir bora internet qahramoniga aylandi. Voqea tafsilotlari “Darakchi” gazetasida keltirildi.

Gap shundaki, kontsertning oxirgi kuni bo'lmish 21 oktyabrda xonanda tug'ilgan kunini nishonlayotgan edi. Kontsert chog'ida Rizaevaga “syurpriz” tariqasida katta ekranda Rossiya va Ukraina estrada yulduzlari Filipp Kirkorov, Ani Lorak, Valeriy Leontev, Stas Mixaylov, Nikolay Baskov va boshqalarning tabriklari namoyish etildi. Ta'kidlanishicha, bu tabrikdan Rizaevaning o'zi ham juda xursand bo'lgan va, balki uning montaj ekanligidan bexabar bo'lgan.

Ertasiga aktrisa Shahzoda Muhamedova ijtimoiy tarmoqdagi o'z sahifasiga o'sha videodan parcha joylashtirilganda ayrim foydalanuvchilar tezda uning originalini topib berdi. Ma'lum bo'lishicha, klip rossiyalik xonanda Lolitaning 50 yilligi munosabati bilan yo'llangan tabriklar kesmasidan iborat ekan.
Bu holat muxlislar o'rtasida qizg'in bahslarni keltirib chiqardi. Munisa Rizaevaning o'zi ham muhokamani kuzatib borgan shekilli, o'zini tutib turolmadi va birozdan so'ng video ostiga “Odamlar, uyalmaysizmi, tuhmat qilishga? Hammangizni Xudo soldim”, deya izoh qoldirdi.

Bunday vaziyat nega yuzaga kelganini kontsert bosh rejissyori Rustam Shamsiddinov ham aniq tushuntirib bera olmadi.
“Syurpriz”ga keladigan bo'lsam, - dedi u, - buni Munisaning fan-klubi a'zolari tayyorlashgan. Nima maqsaddaligini bilmadig-u, tabriklarni to'plab, uni Munisaga qayta taqdim etishgan”.

“Balki rejissyor va fan-klub a'zolari “syurpriz qilishmoqchi bo'lishgandir, ammo bu Munisa uchun omadsiz sovg'a bo'ldi deb o'ylaymiz, - xulosa qildi material muallifi. – Aniqrog'i, aslida boshqa bir yulduzga atalgan, internetdan shundoq ko'chirilib taqdim etilgan ushbu sovg'a darhaqiqat Munisani noqulay ahvolga solib qo'ygani achinarli bo'ldi”.