Mehmonxonalar tashrif buyuruvchilar faqat tunni o'tkazadigan maskan vazifasini o'tamay qo'yganiga ancha bo'ldi. Zamonaviy mehmonxona majmualari turli xizmatlari va o'z arxitekturasi bilan barchani hayratga solib kelmoqda. Quyidagi mehmonxonalar haqiqatan ham qurilayotganiga ishonish qiyin.

1. “Shimao Wonderland InterContinental” — karerdagi mehmonxona

Xitoyning Shanxay shahridagi tashlandiq karerlardan birining hududida “Shimao Wonderland InterContinental” mehmonxonasi qurilmoqda. Inshoot 19 qavatli bo'lib, uning faqat uchta qavatigina er yuzasida bo'ladi. Qolgan qavatlar karer ostida joylashadi. Tashrif buyuruvchilarni nafaqat yuqori darajadagi xizmat, balki banji-jamping, qoyaga tirmashib chiqish, ulkan akvarium hamda 60 metrli shisha sharshara bilan hayratga solish rejalashtirilgan. Ushbu mehmonxonaning qurilishi 2017 yilda nihoyasiga etadi.

2. “Poseidon Underwater Resort” — suv ostidagi mehmonxona

Fiji orolida bir oz vaqtdan so'ng suv ostida joylashgan “Poseidon Underwater Resort” mehmonxonasi paydo bo'ladi. Yashash kapsulalaridan tashqari, suv ostida spa-salon, kutubxona va restoran joylashadi.

3. “The Crescent Hotel” — arka ko'rinishidagi mehmonxona

Ozarbayjon poytaxti Boku barchani o'zining arxitektura durdonalari bilan hayron qoldirishda davom etmoqda. 2016 yilda bu erda ulkan arka ko'rinishidagi balandligi 160 metrli mehmonxona qurilishi yakunlanadi.

4. “Royal Atlantis” — shishadan qurilayotgan mehmonxona

2017 yilda Dubayda ko'rinishi shisha saroyni eslatuvchi “Royal Atlantis” mehmonxonasini ko'rish mumkin bo'ladi. Qurilish qiymati 1,4 milliard dollarni tashkil etadi.

5. “Dawang” tog' kompleksi — Xitoydagi kelajak mehmonxonasi

Xitoydagi tashlandiq tosh konida yana bir mehmonxona qurilmoqda. “Dawang” tog' kompleksi 330ta apartamentga ega 100 metrli minora ko'rinishida bo'ladi. Mehmonxona 2016 yilning oxirida ochilishi rejalashtirilgan.