Rossiyaning Kemerovsk viloyatida yashovchi 20 yoshli yigit armiyada xizmat qilish uchun 46 kg vazn tashladi. Bu haqda RIA Novosti agentligi Markaziy harbiy okrug vakili Yaroslav Roshchupkinga tayangan holda ma'lumot berdi.

“Kuzbasslik chaqiriluvchi, 20 yoshli Sergey Malyovanniy armiyada xizmat qilish uchun 46 kg vazn tashladi. Shu tariqa u o'z yaroqlilik kategoriyasini G darajasidan (harbiy xizmatga vaqtincha yaroqsiz) A darajasiga ko'tardi (cheklovsiz yaroqli). Bu unga maxsus qismlarda ham, razvedkada ham, desant kuchlarida ham xizmat qilish imkonini beradi”, - ma'lum qildi Roshchupkin.

Aytilishicha, yigit bahorda 171 sm bo'yga va 130 kg vaznga ega bo'lib, harbiy xizmat uchun yaroqsiz deb topilgan edi. Sambo, umumjismoniy tayyorgarlik, shuningdek, parhez yordamida u 84 kg vaznga ega bo'lib, kuzgi komissiyadan o'ta oldi.