Саёҳат қилишни ёқтирасиз, лекин чодир ўрнатиш муаммоси сиз учун бош оғриғи. Энди бу ҳақда ўйланмасангиз ҳам бўлади. Даниялик Мадс Йохансен ҳақиқий ғилдиракли уй ихтиро қилди.

Унинг ихтироси Wide Path Camper деб аталади. Унинг сўзма-сўз таржимаси “кенг йўл кемпери”, деган маънони билдиради. Дарҳақиқат, бундай велотиркама билан тор сўқмоқ йўлларда юришнинг иложи йўқ. Лекин кенг йўлларда юришда бу мобил уйга тенг келадигани топилмайди.

Велокемпер саноқли сонияларда тиркамадан уйга айланади. Унинг ичига бир фарзанди бор оила жойлашиши мумкин. Чодирнинг эни 99 сантиметр, бўйи эса 260 сантиметрга тенг. Унинг ичида тик туришнинг имкони йўқ, чунки баландлиги 130 сантиметр келади, бироқ табиат қўйнида дам олиш учун шунинг ўзи етади.

Кемперда иккита диванча ва стол бор. Столни йиғиб, диванларни бирлаштирилса, ётоқхона ҳосил бўлади.

Йиғилган ҳолатда кемпер икки баробарга кичраяди. Унинг умумий оғирлиги 45 килограммга тенг. Уни бир неча лаҳзада велосипедга улаб, йўлга тушиш мумкин.

Фақат велотиркаманинг нархи кишини бир оз ўйлантиради.

Унинг нархи 2000 евро бўлиб, қўшимча имкониятлар билан нархи янада қимматлашади. Қимматроқ велокемперлар  ошхона, мебель, ҳаттоки қуёш батареяси билан жиҳозланган бўлади.