The Verge jurnali muharriri Vlad Savovning fikricha, flagmanlik smartfonlari davri nihoyasiga etmoqda: bozorda raqobat shu qadar kuchayib ketdiki, birorta uskunani ham eng yaxshi deb hisoblab bo'lmaydi, o'rta narx kategoriyasidagi apparatlar esa qimmatbaho gadjetlardan sifat jihatidan deyarli qolishmaydi.

Savovning fikricha, 5 yil muqaddam smartfonlar bozoridagi vaziyat oddiy edi: har bir ishlab chiqaruvchining o'z flagmani bor edi – Nokia N8, Xperia X10, Palm Pre yoki iPhone 4.
Ammo 2015 yilga kelib qaysi kompaniyaning qaysi uskunasi eng yaxshi ekanligini bilib bo'lmay qoldi: Apple’da iPhone 6s va 6s Plus, Samsung’da Galaxy S6 va Note 5, LG’da G4 va V10, Microsoft’da Lumia 950 va Lumia 950 XL, Nexus’da esa 5X va 6P bor.

Endi ishlab chiqaruvchilar bir xil o'lcham va ko'rsatkichdagi uskuna hammaga ham to'g'ri kelavermasligini tushunmoqda. Bundan tashqari, operatsion tizimlar bozorida iOS va Android raqobatchilarga deyarli hech qanday imkoniyat qoldirmadi, va ayni paytda kun sayin bir-biriga yaqinlashmoqda.

Savovning fikricha, bu vaziyat ishlab chiqaruvchilardan birortasi etakchilikka erishishini nihoyatda murakkablashtirib yuboradi. Shu bois bunday kompaniyalar eksperimentlarga borishiga to'g'ri keladi. Jumladan, Lenovo Vibe P1 5000 mA/soatlik akkumulyator ishlab chiqdi, ammo bu ham keyinchalik barcha uchun standart bo'lib qoladi. Apple darajasidagi gigantlar esa takliflar xilma-xilligini oshirishga majbur, masalan, iPhone gulob rangda chiqarilmoqda.

Oxirgi yillarda deyarli har bir yangi raqobatchi flagmanni “iPhone qotili” deb atashgan edi, ammo ulardan hech qaysi bu maqomni ushlab tura olmadi, va bu atama mazmunini yo'qotdi.

“O'ldirish mumkin bo'lgan Ayfon endi yo'q — endi atrofda hammasi ayfonlar, kattasi va kichigi, qimmati va arzoni. “Flagmanlik” tavsifini endi har qanday narx kategoriyasidagi smartfondan topish mumkin”, - tushuntirdi Savov.

“2015 yilda smartfon xarid qilish juda qiyin va ayni paytda juda oson vazifaga aylanib qoldi, - so'zida davom etdi Savov. – Nyuanslarda chalkashib ketish hech gapmas, ammo deyarli jiddiy adashmaysan. Agar foydalanuvchi o'z instiktlariga ishonib bir qarashda o'ziga to'g'ri keladigan uskunani xarid qilsa, u adashmaydi. Darhaqiqat ishlatishga yaroqsiz smartfonlar zamoni o'tdi”.

“Shu bois ham biz flagmanlar uchun xayrlashuv bazmidamiz, desak bo'ladi, - xulosa qildi noshir. – Smartfonlar dasturiy va apparat ta'minotiga ko'ra ortiq darajada bir-biriga o'xshash bo'lib qoldi, ulardan aniq birortasini ajratib ko'rsatib bo'lmaydi.

Flagmanlar boshqa yo'q, chunki barcha smartfonlar juda o'xshash bo'lib qoldi – barchasining orasidan eng yaxshisini tanlab olish imkoniyatini beradigan detallar o'ta sub'ektivlashib, g'alati va hatto kulgili bo'lib qoldi. Butun flot kuchli bo'lgan bir paytda flagmanlar kimga kerak?”.